寫詩ê人
Podcast
69 episodes
2026-06-03
一个人
＜一个人＞ 賰一个人ê時 就來去旅行啦！ 全世界，攏變你ê 你ê影，bē koh孤單 綴你千山萬水 千山萬水 就kā遊山玩水 千千萬萬ê你 一个接一个，出世 賰一个人，是智覺 毋是事實，因為咱 自本就是一个人 一个人 自本就是一个世界 和別人無底代 花，家己開家己媠 四界摸飛ê時 你就是千山萬水 自在...... #安搭42 賰：tshun，剩。 綴：tuè，跟隨。 無底代：bô-tī-tāi，不相干。 摸飛：moo-hui，四處遊玩。 媠：suí，漂亮。 （2026/5/21） #詩聲筆記 ＜覺悟＞ 凡勢，你會感覺現此時ê我，根本就是一葩譀古。 我自2015年退休了後，平常時仔攏是一个人過生活，規工和人講無半句話，是四常ê代誌。 這馬這種社會連買物件mā免開喙。載具、鑢卡，自動結數。連找錢都免。 毋過，大部分時間我bē感覺寂寞孤單，因為足早我就智覺，咱人攏是獨立ê性命，自本就是一个人。 毋過你知，人若心剖開，攏誠軟汫，有當時仔彼款智覺會拍無去，有彼款‘’賰‘’一个人ê感覺；彼个‘’賰‘’，才致使寂寞孤單。若像hōo天神放捒ê囡仔仝款；眼前，一片茫茫ê世間。 我敨解ê步數，毋是去揣人，是家己一个人去旅行。換一个情景，koh kā家己抾轉來。效果上好ê是山林；大自然是咱外家；傷痕，真緊就會安搭。 彼工，我koh去行躊躇7年跤才振動ê古路，這款刺疫ê熱天，有影，隨心涼脾土開。樹木草花、鳥隻蟲thuā，山溪塗沙，攏是友志。攏是家己ê化身。 咱台語人，tī這款嘻嘩社會，彼款‘’賰‘’ê意念，定著常在會浮出來；咱愛有這款覺悟。尤其我這款寫詩、又koh寫彼款詩ê人，永遠無可能像人日花閃爍遐奢颺；咱極加是一葩暗毿ê月光。 覺悟，譀古才有微微光，小可炤入去幸福ê門。 （2026/6/3）
2026-04-30
油桐花
＜油桐花＞ 山，一搭一搭 直直白 春天beh焦蔫ah 風，若吹 花，就落雨ah 輕輕仔，飛 飛入你目睭 飛入阮心肝底 變做相思 飛去海角天邊 化做雪 輕輕，落塗 啊！一節彎彎斡斡 媠媠ê，戀愛古...... #安搭24 焦蔫：ta-lian，枯萎。 斡：uat，轉彎。 （2026/4/22） #詩聲筆記 ＜愛恨交纏＞ 有影！咱人，和世間，總是一半歡喜，一半哀愁；悲喜交集，是性命ê真面目。 彼工下晡，雨拄落煞，看烏雲慢慢仔leh散，就緊來去社頭山裡行行leh，一工無來浸樹林，吹風洗浴，規身軀就礙虐礙虐。 你知，椅條定著未焦；免驚，我揹仔內有攢塑膠彼款噗仔紙，kā舒leh，不止仔四序。 我喙舌頂ê咖啡，當leh神神心爽ê時，一陣微微風，無疑悟，頭前一二十公尺遠彼欉油桐花，雄雄suah敢若落雪leh，媠甲；一幅天生自然、恬靜ê圖，浮tī目睭底。歡喜。 啊是leh哀愁啥物？你定著會憢疑。咱知，油桐花，生tī遮窮實是無自然ê代誌；伊，毋是在來原生，是中國籍ê入侵種。 往過，為著beh煉桐油、取柴料，種kah滿山滿嶺；這馬，無經濟價值ah，suah湠kah規山坪，對咱生態環境是大敗害。 更加僥倖ê是，咱人kā伊和客家文化縛做伙leh絞；其實根底並無任何牽連，是假包ê文化。 活動，鬧鬧熱熱；錢開了，客語suah綴嘻嘻嘩嘩ê笑聲，慢慢走消失去ah。敢若無人要意...... 毋過，花，正港是媠ê；活靈靈ê性命。花媠無罪；人ê孽，愛伊來擔，講bē得過。敢毋是？ 愛恨苦樂，交纏；bē輸一葩戀愛古。唉！寫一首來贖罪。 （2026/4/30）
2026-04-22
緣故
＜緣故＞ 花就按呢開ah 無緣無故 無緣無故 mā是一款因緣 誦經，拄煞 聲，無koh執迷 綴雲散去 日頭，覕雨縫 leh探頭 微微仔笑ê天 現此時，全世界 若像賰一个我 小可清芳 風，mā微微 敢若跋落春天 目睭裡 啊！我，tī佗位？ #安搭15 #大花馬齒莧 綴：tuè，跟隨。 覕：bih，躲藏。 跋：pua̍h，跌倒。 （2026/4/7） #詩聲筆記 ＜雨縫＞ 清明隔轉工，看有雨縫，就隨來百果山lau-lau行行leh。 來遮，主要ê因端，是神社。雖罔kan-na賰一寡遺跡，彼款古早味，常在hōo我ê心神淡薄仔出路；時間迷人ê所在，是你看無摸無，毋過會當浸tī茫渺ê聲嗽裡，小悠哉一下。 我uì參拜路，一層一層peh起lih，慢慢仔踏，慢慢仔聽家己ê跤步聲；敢若kā靈魂洗浴leh，心綴leh恬靜。 神社面頂ê山，有一間宮廟，廟後山有一个涼亭仔。遮就是我歇跤食茶咖啡ê所在。 彼工，搪著廟leh誦經，pìn-piàng叫，本底beh旋，尾仔發見廟倒爿埕ê石桌，聲拄好擋牢leh，就改tī遐坐。無疑悟，陣勢排好，誦經隨煞。歡喜甲。 啉咖啡，看景緻，想詩；mā leh戇想，誦經，是修行，廟若莫燒金燒香，莫用mài-khù，毋知偌爾好leh...... 想罔想，目睭一下躊躇，suah看著桌邊ê草埔，豬母奶開花ah，這阿啄仔種，花大大蕊，mā是媠—— 媠媠ê因緣。 （2026/4/22）
2 days ago
一个人
＜一个人＞ 賰一个人ê時 就來去旅行啦！ 全世界，攏變你ê 你ê影，bē koh孤單 綴你千山萬水 千山萬水 就kā遊山玩水 千千萬萬ê你 一个接一个，出世 賰一个人，是智覺 毋是事實，因為咱 自本就是一个人 一个人 自本就是一个世界 和別人無底代 花，家己開家己媠 四界摸飛ê時 你就是千山萬水 自在...... #安搭42 賰：tshun，剩。 綴：tuè，跟隨。 無底代：bô-tī-tāi，不相干。 摸飛：moo-hui，四處遊玩。 媠：suí，漂亮。 （2026/5/21） #詩聲筆記 ＜覺悟＞ 凡勢，你會感覺現此時ê我，根本就是一葩譀古。 我自2015年退休了後，平常時仔攏是一个人過生活，規工和人講無半句話，是四常ê代誌。 這馬這種社會連買物件mā免開喙。載具、鑢卡，自動結數。連找錢都免。 毋過，大部分時間我bē感覺寂寞孤單，因為足早我就智覺，咱人攏是獨立ê性命，自本就是一个人。 毋過你知，人若心剖開，攏誠軟汫，有當時仔彼款智覺會拍無去，有彼款‘’賰‘’一个人ê感覺；彼个‘’賰‘’，才致使寂寞孤單。若像hōo天神放捒ê囡仔仝款；眼前，一片茫茫ê世間。 我敨解ê步數，毋是去揣人，是家己一个人去旅行。換一个情景，koh kā家己抾轉來。效果上好ê是山林；大自然是咱外家；傷痕，真緊就會安搭。 彼工，我koh去行躊躇7年跤才振動ê古路，這款刺疫ê熱天，有影，隨心涼脾土開。樹木草花、鳥隻蟲thuā，山溪塗沙，攏是友志。攏是家己ê化身。 咱台語人，tī這款嘻嘩社會，彼款‘’賰‘’ê意念，定著常在會浮出來；咱愛有這款覺悟。尤其我這款寫詩、又koh寫彼款詩ê人，永遠無可能像人日花閃爍遐奢颺；咱極加是一葩暗毿ê月光。 覺悟，譀古才有微微光，小可炤入去幸福ê門。 （2026/6/3）
2026-04-30
油桐花
＜油桐花＞ 山，一搭一搭 直直白 春天beh焦蔫ah 風，若吹 花，就落雨ah 輕輕仔，飛 飛入你目睭 飛入阮心肝底 變做相思 飛去海角天邊 化做雪 輕輕，落塗 啊！一節彎彎斡斡 媠媠ê，戀愛古...... #安搭24 焦蔫：ta-lian，枯萎。 斡：uat，轉彎。 （2026/4/22） #詩聲筆記 ＜愛恨交纏＞ 有影！咱人，和世間，總是一半歡喜，一半哀愁；悲喜交集，是性命ê真面目。 彼工下晡，雨拄落煞，看烏雲慢慢仔leh散，就緊來去社頭山裡行行leh，一工無來浸樹林，吹風洗浴，規身軀就礙虐礙虐。 你知，椅條定著未焦；免驚，我揹仔內有攢塑膠彼款噗仔紙，kā舒leh，不止仔四序。 我喙舌頂ê咖啡，當leh神神心爽ê時，一陣微微風，無疑悟，頭前一二十公尺遠彼欉油桐花，雄雄suah敢若落雪leh，媠甲；一幅天生自然、恬靜ê圖，浮tī目睭底。歡喜。 啊是leh哀愁啥物？你定著會憢疑。咱知，油桐花，生tī遮窮實是無自然ê代誌；伊，毋是在來原生，是中國籍ê入侵種。 往過，為著beh煉桐油、取柴料，種kah滿山滿嶺；這馬，無經濟價值ah，suah湠kah規山坪，對咱生態環境是大敗害。 更加僥倖ê是，咱人kā伊和客家文化縛做伙leh絞；其實根底並無任何牽連，是假包ê文化。 活動，鬧鬧熱熱；錢開了，客語suah綴嘻嘻嘩嘩ê笑聲，慢慢走消失去ah。敢若無人要意...... 毋過，花，正港是媠ê；活靈靈ê性命。花媠無罪；人ê孽，愛伊來擔，講bē得過。敢毋是？ 愛恨苦樂，交纏；bē輸一葩戀愛古。唉！寫一首來贖罪。 （2026/4/30）
2026-04-22
緣故
＜緣故＞ 花就按呢開ah 無緣無故 無緣無故 mā是一款因緣 誦經，拄煞 聲，無koh執迷 綴雲散去 日頭，覕雨縫 leh探頭 微微仔笑ê天 現此時，全世界 若像賰一个我 小可清芳 風，mā微微 敢若跋落春天 目睭裡 啊！我，tī佗位？ #安搭15 #大花馬齒莧 綴：tuè，跟隨。 覕：bih，躲藏。 跋：pua̍h，跌倒。 （2026/4/7） #詩聲筆記 ＜雨縫＞ 清明隔轉工，看有雨縫，就隨來百果山lau-lau行行leh。 來遮，主要ê因端，是神社。雖罔kan-na賰一寡遺跡，彼款古早味，常在hōo我ê心神淡薄仔出路；時間迷人ê所在，是你看無摸無，毋過會當浸tī茫渺ê聲嗽裡，小悠哉一下。 我uì參拜路，一層一層peh起lih，慢慢仔踏，慢慢仔聽家己ê跤步聲；敢若kā靈魂洗浴leh，心綴leh恬靜。 神社面頂ê山，有一間宮廟，廟後山有一个涼亭仔。遮就是我歇跤食茶咖啡ê所在。 彼工，搪著廟leh誦經，pìn-piàng叫，本底beh旋，尾仔發見廟倒爿埕ê石桌，聲拄好擋牢leh，就改tī遐坐。無疑悟，陣勢排好，誦經隨煞。歡喜甲。 啉咖啡，看景緻，想詩；mā leh戇想，誦經，是修行，廟若莫燒金燒香，莫用mài-khù，毋知偌爾好leh...... 想罔想，目睭一下躊躇，suah看著桌邊ê草埔，豬母奶開花ah，這阿啄仔種，花大大蕊，mā是媠—— 媠媠ê因緣。 （2026/4/22）